Saturday, January 26, 2013

அந்தரத்தில் மிதக்கும் வேரொன்று!!!



வெவ்வேறு சுவையோடு துறுவலாய் மிதந்து
காதினுள் ருசிக்கும் உணர்வுகள்!
கசக்கும் சில!
துவர்க்கும் சில!
வெடிக்கும் காரமாய் பல!
காதுகள் தேடுவதோ
இனிப்பையும் இனிப்பு போன்ற சிலவற்றை மட்டுமே!!!


விதவிதமாய் மாறும் வானங்கள்!
முக்கோணமாகி, வட்டத்திலிருந்து சதுரமாய்
சட்டென்று பல்லாயிரம் வடிவத்தில்
உருவம் மாறும் வானத்தின் மூலைகளிலிருந்து
தூவலாய் ஒடிந்து விழும் கனவுகள்
பறந்து வந்து வித்தாகி முளைக்கிறது மூளைகளுக்குள்!!

நிறமும் மாறிப்போகும் வண்ண வானத்துக்குள்
இங்கொன்றும் அங்கொன்றுமாய் மாறி மாறி
பறக்கும் பட்டங்களாய் சுவையோடு திரியும் காதல்கள்!
அண்டம் முழுக்க திரியும் மேகங்களுக்குள் ஆணிவேர் நங்கூரமிட்டு
காதுகளும் கண்களும் மூளைகளும் கொண்ட மனிதர்களுக்குள்
நானும் எனக்கான ஒரு குட்டி மேகத்திரளினுள்!!!

தாவி தாவி இனிப்போடு சேர்ந்து
தூவலாய் விழும் கனவுகள் விழுங்குவதில்
உயிர் சிலிர்க்கிறது!
பனி பஞ்சு போல உதிர்ந்து கொண்டிருக்கும் கனவுகள்
சில நேரம் என்றோ கட்டி மறக்கப்பட்ட
வெறுமையான பறவை கூடுகளில்
மொத்தமாய் திரண்டு உறைகிறது!
அதை அள்ளி தின்று மிதக்கிறேன்!

சுற்றி இருக்கும் மேகங்களுக்குள் சிரித்தப்படி
பறக்கும் மனிதர்களுக்கெல்லாம்
ஆணிவேர் நிலைத்து நிற்கிறது!
கருமையான இருட்டொன்றில் என்
ஆணிவேர் அறுந்து பறந்துபோய்விட்டத்தில்
அழுகி போனது என் மேகத்தின் ஒரு பகுதி!
மேகமும் நானும் இன்னமும்
பறக்கயத்தனிக்கிறோம்
புதிது புதிதாய் முளைக்க தொடங்கியிருக்கும்
நார்வேர்தொகுதியோடு!!